Удавас ноябрь 1-ниң хүнүнде - тыва дылдың байырлалы

Удавас ноябрь 1-ниң хүнүнде - тыва дылдың байырлалы. Аңаа уткуштур хөй хемчеглер аразында Национал музейниң ажылдакчыларының база бир четтикпейн манаары хемчег – Улусчу диктант. Бодунуң төрээн дылын кайы-хире билирин, ооң дүрүмнерин сөзүглелди дыңнап тургаш, саазынга дамчыдары база нарын онаалга, ооң ужун сагыш-сеткил дойлуп, дүвүрей бээри чөп. Ынчангаш «кижи кижиден кончуг, киш киштен кара» дээни дег, кулак-биле эки дыңнап, карак-биле ыяк хынап, хол-биле чүгүртү бижип, карак-кызыл бижикке маргылдаалааннар. Тыва дылдың онзагайларын шын бижип, бижик демдектерин турар ужурлуг черлеринге салыры - ындыг белен эвес дээрзин кижи бүрүзү бодунуң кежинге шыдажып эрткеннер. Оларның аразында бодунуң дылын тергиин эки билирлери база хөй болганы өөрүнчүг. Мындыг уткалыг хемчеглер тыва дылды кандыг-даа назылыг кижиниң харыысалгалыг билиринче кыйгырып, сөске камныг, хумагалыг болурун өөредип турарын демдеглевес аргажок. Эки демдек алырын кайы-даа ажылдакчы күзээр, оозу чөптүг. А эң эки шаңнал – бодунуң дылын боду хүндүлеп, ону бокталдырбайн, чараш кылдыр эдилээри - ол ёзулуг үнелел. Фоточуруктар Радион Донгактыы https://vk.com/tuvacult?w=wall-20358661_59834&ysclid=loa2t6w2ha229108664