​Нах вIашкаозара бахьан Июнь бетта 23-ча дийнахьа Назранерча «Амина» яхача хозала салоне заIапдолча бераштеи, таро эсала йолча дезала бераштеи лаьрхIа вIашагIкхетар дIадихьар, заIапхой хаттарах йолча ГIалгIайчен Правительства координационни совета доакъашхочо Ахилгнаькъан Мадинас. Укх салона кулгалхо из Мадина ше я. Укхаза гулбеннабар тайп-тайпара лазараш дола унахой, цул совгIа могаш бола, цхьаккха тайпара лазар доаца нах а бар укхаза баьхка. Уж вIашагIтохара маIан дар нах, къаьстта бераш шоайла довзийтар, вIаший гIулакх лацийтар, хIаьта керттера бахьан дар – мархий бутт. Укх бетта берашка, цу тIа могаш доацачарга сакъердийта, самукъадаккхийта уйла йолаш бар салона викалаш. Ала деза, ер салон вай Iаьдала гIо дарца Мадинас хьайийллай 2014-ча шера, лаьрххIа заIап болча нахаи иштта кхы дIахоболча нахаи, аьнна. Укхаза дукха боагIа нах шоай мос дIанийсъейтеи, дIатассийтеи – унахой а лерттIа могаш бараш а. Тахан а бар укхаза баьхка мос тоссийташ нах. Хозала салона кулгалхочо Ахилгнаькъан Мадинас хьаяхачох, укхаза цхьаболча наха мах боацаш гIулакх ду. «Мичча хана моллагIча дийнахьа хьаварах, тхо балха деношка коляска чу вагIаш волча унахочун мос мах боацаш дIатосс оаха. ХIаьта мархий бетта массаболча унахошта мах боацаш да мос дIатассар. Юххьанца хьайийлача хана санна а доацаш, тIехьарча хана кхоачам болаш нах хул тха салоне, шоай мос дIатассийта хьабаьхке. ХIаьта тахан ер вIашагIкхетар даьд берашка чай малийта а, сом баийта а, цхьацца мерзадаараш даийта а, цар самукъадалийта а уйла йолаш. Цул совгIа, цу хIаман тIагIолла шоайла бовзар а хул цар», — йоах Мадинас ший къамаьле.Цхьа моллагIдола хIама хьадеш хилча, дукха хIама эш сага. Цу тайпара хIама да ер а. Укхаза болх хьабеш болча болхлошта мах бала беза, эша хIама вIаштIехьадоаккхаш салон лоаттае еза. Из а ший тайпара да укхаза. «Унахой а боацаш, кхыбола нах а ма ухий тхо долча, шоай мос дIатассийта хьабаьхке, цудухьа цу наха хьалуш болча маьхах болхлошта алапи дала а, дIахо эшашдола гIулакх кхоачашде а аьттув боал тха. Таханарча дийнахьа заIамхой мос мах боацаш дIатессаяр аьнна тха кIалдиса хIама дац», – йоах Мадинас.МоллагIволча унахочунца болх беш хилча, цун гIулакх довза деза, цун лазар сенна да ховш хила веза саг. Иштта цахилча, царца болх бе хала да. Мадина ше, цхьан хана машено лозаяь, когаш дIа а цалелеш йиса, коляска чу ягIаш я. Цо дика кхетаду из гIулакх. «Эггара хьалха тхоай болхлой мос тасса болабалалехь, Пятигорске дIа а бахийта, цига курсаш яхийтай аз, къаьстта могаш боацача нахаца болх мишта бе беза царна ховргдолаш. Парикмахераш хиларал совгIа, психолагаш а ба уж. Бера дукха хIама ма эший, моллагIа цхьа харцахьа цо хIама даь, е цунна ца довзаш хIама хилча, е бер делха доладелча, из цох дIакхетаде, теде ховргдолаш кийчбаьб болхлой. Таханарча дийнахьа из гIулакх дика вIаштIехьа а доал вай», — йоах дIахо Мадинас, ший болхлоех яшаш йолаш.МоллагIа могаш воаца саг, цIаьхха из цамогаш хинна хилча хIаьта а, наха юкъе аравала лоархIа цавеш, наха шийна пIелг тIахьокхар кхераш хул. Бакъда, уж нах тайса ца а буташ цу нахаца болх хьабе беза. «ТIехьарча хана, хьалха санна а доацаш, заIапхошцара гIулакх дикагIча оагIорахьа хувцаденнад вай мехка, Даьла къахетамца. МоллагIвола заIапхои могаш вола саги укхаза мос тоссаш цхьана нийсбелча, шоайла къамаьле а байле, шоайла бовзар хул цар. ТIаккха, укхазара дIаарабайлача а, новкъостий хиле, тIехьагIа шоайла вIашагI а бетталуш, доттагIал а тассе дIаболхаш а нийслу. Айса моллагIа а цхьа дика деча хана, наха гIо-новкъостал деча хана, мел кIезига из дале а, саг цох кIеззига хинна а иразе волаш сона гой, керахьа цхьа аттеи, хозеи хета сона. Цудухь вай массадаргаш а хIама эшаш болча нахага хьажар дехар аз. Дукха дIаьха а мича да ер дуне», — йоах Мадинас, ше чакхйоаллаш.Укх хозала салоне моллагIвола саг ва йиш йолаш ва, ший мос дIатассийта, воккха, зIамига, маIа е кхал аьнна нах къоастабаь хIама дац укхаза. Кхалнаьха мос дIатоссаш кхалсаги, маIача наьха мос тоссаш маIа саги ба укхаза. Фу аргда, дика хет укх тайпара хIама дIадола а даь, цох наха пайда беш нах хилар. Тахан вай цхьана овтте, вIалла хала а доацаш, вай вахар аттача дерзаде йиш йолаш да вай.ХIаьта Мадийнай дала дикача хIаманна тIехьа аьттув боаккхалба. Могаш мел боацача наха Дала моаршал лулда.Матенаькъан ИлезГазета «Сердало» № 96
Читать новость полностью на сайте "Сердало"