Хотугу аҕыйах ахсааннаах норуоттар тыйаатырдара аан дойду Чөмпүйэнээтигэр кыттыаҕа

Дьокуускайтан Хотугу аҕыйах ахсааннаах норуоттар тыйаатырдара уу успуортугар аан дойдутааҕы Чөмпүйэнээт культурнай бырагырааматыгар кыттыаҕа. Чөмпүйэнээт от ыйын 12 күнүттэн 28 күнүгэр диэри Корея Кванджу куоратыгар ыытыллар. Бу туһунан СӨ култуура уонна духуобунай сайдыы министиэристибэтигэр эттилэр. Тыйаатыр дэлэгээссийэтэ Кореяҕа 26 киһи буолан барыаҕа. Бу састаапка тыйаатыр артыыстара уонна “Тэтим” норуот муусукатын ансаамбылын артыыстара киирдилэр. Саха сирин артыыстара 1 чаас 20 мүнүүтэлээх бырагыраама бэлэмнээтилэр. Араас түһүлгэлэргэ кыттыахтара. “Саҥа дьыл иннинэ кыттар туһунан этии киирбитэ. Баҕар, Кореяҕа 2016 сыллаахха кыһыл көмүс бирииһи ылбыппытын иһин ыҥырбыттара буолуо. Бу кыһын чөмпүйэнээт культурнай бырагырааматын тэрийэр кэмитиэтин чилиэнэ кэлэ сылдьыбыта. Үс көрсүһүү былааҥҥа турар. Ол курдук чөмпүйэнээт культурнай бырагырааматын дириэксийэтин уонна Кванджу куорат салалтатын кытта көрсүөхтээхпит”, – диэн Виктория Анисимова кэпсээтэ. Көрөөччүлэргэ хас даҕаны нүөмэри бэлэмнээтилэр.Ол иһигэр “Девушка-стерх” диэн эбэҥки испэктээгиттэн быһа тардыы, Хотугу аҕыйах ахсааннаах норуоттар тыйаатырдарын кэнсиэрдиир нүөмэрдэрэ, “Тэтим” ансаамбыл бастыҥ нүөмэрдэрэ туруохтара.