Уус Алдан саҥа тутуллубут сайылыгар үрүҥ илгэни үрүлүтэ сүүрдэргэ аныгы усулуобуйа олохтоммут

NVK-ONLINE.RU – Быйыл Уус Алдан улууһун Лөгөй нэһилиэгэр өссө биир саҥа сайылык тутуллан үлэҕэ киирдэ. Үлэһиттэр олорор дьиэлэрэ, саҥа ыанньык титиигэ, массыынанан ыыр оборудование, үүт сыаҕа – аныгы кэм сайылыгар олорорго, үлэлииргэ бары усулуобуйа барыта тэриллибит. Бүөм сиргэ турар “Туртай” сайылык кураан да күннэргэ ото халтаҥнаабатах, мэччирэҥэ үчүгэй. Манна төбөлөөҕүнэн 100 ынах, онтон ыанара – 73, ону тэҥэ 69 ньирэй көрүллэн турар. Ыанньыксыттар быйылгы былааны толорор туһугар күҥҥэ үстэ ыан, ортотунан 400-тэн тахса лиитэрэ үүтү туттараллар. Саҥа сайылык хаһаайына Лөгөй нэһилиэгин олохтооҕо, бааһынай хаһаайыстыба салайааччыта Анатолий Бурнашев тыа сиригэр сүөһүнү иитэргэ саҥа суоллары киллэрэргэ тэрээһиннээх үлэни ыытар. Сайылыкка үлэһиттэргэ үлэлиир, сынньанар усулуобуйа толору тэриллибит. Каркаһынан тутуллубут дьоҕус дьиэлэр, суунар сир, сайыҥҥы беседка, ыанньык титиигэ, массыынанан ыыр оборудование, үүт сойутар установка, саҥа даллар, хаһаалар былырыыҥҥы сылтан саҕаланан, билигин тутуу үлэтэ силигэ ситэриллэр. Барыта үс ыанньыксыт, биир бостуук, икки ньирэй көрөөччү сайыҥҥы өлгөм үүт күннэригэр үлүмнэһэ үлэлииллэр. Аныгы кэм урбаанньыта Анатолий Бурнашев тыа сирин үлэтэ-хамнаһа тахсыылаах буоларыгар, эбии аһылык быһыытынан суданскай оту ыһыынан дьарыктаммыта хас да сыл буолла. Быйыл 20 гектар сиргэ суданскай оту, 80 гектарга эбиэһи уонна рапс оту ыһан, кураан да күннэргэ үүнүүнү ылар сөптөөх суолу тобулла. Бу курдук мындыр толкуйунан салайтаран, саҥа сайылык хаһаайына Анатолий Бурнашев саҕалаабыт үлэтигэр хоннохтоохтук ылсан эрэр.