Нам улууһун киинигэр суоппар дьахталлар икки ардыларыгар «Автоледи» күрэх ыытылынна NVK-ONLINE.RU - Чөл олоҕу, суолга сэрэхтээх буолууну көҕүлүүр «Автоледи» күрэҕэр быйыл кыттааччы ахсаана үгүһэ суох эрээри, бэрт тыҥааһыннаахтык ааста. Уопсайа 4 кэрэ аҥар тэрээһиҥҥэ кыттарга баҕа санааларын биллэрэннэр, аан маҥнай суол быраабылатын теориятын туттардылар. Итиэннэ Намнааҕы автодромҥа тиийэннэр массыыналарынан, эрийэ-буруйа айаннаатылар итиэннэ парковкаланнылар. Маны тэҥэ миэстэтигэр дьүүллүүр сүбэ тимир көлө тас көрүҥүн сыаналаата. Бэлиэтээтэххэ үгүстэрэ массыыналарын сахалыы тыыннаах киэргэппиттэр. Оттон Хатыҥ-Арыы нэһилиэгин олохтооҕо Екатерина Соловьева түүннэри-күнүстэри бэлэмнэммит түмүгэр барыларыттан ордук чорбойдо. Салгыы Хамаҕатта нэһилиэгэр конкурс кытттыылаахтара бэйэлэрин кытары билиһиннэрдилэр. Итиэннэ суолга хараҥа кэмҥэ, оҕолор олохторугар кутал суоһаабатын туһугар бэйэлэрин илиилэринэн оҥорбут светоотражающай элеменнарын дьүүллүүр сүбэ иннигэр көрдөрдүлэр. Маны сэргэ суоппарга сыһыаннаах боппуруостарга хоруйдаатылар. Оттон саамай тыҥааһыннаах түһүмэҕинэн буолла ырыа матыыбын таайыы. Түмүккэ дьүүллүүр сүбэ быһаарыытынан, Хамаҕатта нэһилиэгиттэн төрүттээх Аэлита Местникова бастакы миэстэни таҕыста. Оттон Гран-При үрдүкү ааты, 4 оҕолоох дьиэ кэргэн амарах ийэтэ Екатерина Соловьева ылары ситистэ. Бэлиэтээтэххэ инники күөҥҥэ тахсыбыттар республика таһымнаах «Автоледи» конкурсугар Нам улууһун чиэһин көмүскүөхтэрэ.
Читать новость полностью на сайте "НВК "Саха""