Күн-дьыл туруга эмискэ уларыйыытын үөрэхтээхтэр, билгэһиттэр хайдах быһааралларый?

NVK-ONLINE.RU – Урут климат сылыйыыта диир эбит буоллахтарына, билигин күн-дьыл туругун уларыйыыта диэн буолар. Анал үөрэхтээхтэр этэллэринэн, бу Саха сиригэр эрэ буолбакка, бүтүн аан дойду үрдүнэн уларыйар. Голландияҕа биллэ итийдэ, Соҕуруу Африкаҕа кураан буолла, оттон Соҕуруу-Илиҥҥи Азияҕа самыыр элбээтэ. Дьон күн-дьыл туругун сылтан сыл муодарҕыыр, ол эрээри былырыын да, иллэрээ сыл да көстүү маннык этэ. 150 сыл тухары улахан уларыйыы буолбата диэн климаты үөрэтээччи Александр Кононов этэр. 1500 тыһыынча учуонай ааҕыллар аан дойдутааҕы бөлөҕө 2014 сыллаахха улахан отчуот таһаарбыта. Онно климат уларыйыытын сүрүн биричиинэтинэн сир анныттан тахсар оттук, нефть, газ – паар эттигин таһаарыыта буолар. Паар элбээбититтэн сылыйыы тахсар. Ордук 60-с сыллартан индустрия сайдыытын кытта күн-дьыл хаамыыта уларыйан барбыт. Холобур, тохсунньу урукку сыллартан 8 кыраадыһынан сылыйда. Эрдэ айылҕа аномалията диэн ааттанар көстүү сылга 4-5 буолар эбит буоллаҕына, кэнники 15-20-ҕэ тиийэр буолла. Манна кыһыҥҥы кэмҥэ самыыр, сайыҥҥы кэмҥэ хаар түһүүтүн этэллэр. Үөрэхтээхтэр биһиги салгыммыт Сахараттан туох да атына суох дэһэллэр. Сылга 250 мм осадок түһэр, биллэн турар, ол тыа хаһаайыстыбатыгар үчүгэй диэн сыаналыыллар. Онтон норуокка билгэһитинэн биллэр Максим Сибиряков туох санаалааҕый? Максим Николаевич кэтээн көрүүтүнэн ахсынньы былаһын тухары сылаас этэ, онон бу ыйга нэдиэлэ курдук итийииһи, ол эрэн 20 кэннэ тымныы былыттаах ардахтаах күннэр кэлиэхтэрэ. Аны тохсунньу 22 күнүгэр сылыйыы бэлиэтэммит, онон сылыктаатахха, от ыйыгар улахан хаһыҥ түһүөн сөп диэн билгэһит этэр.