Өрөспүүбүлүкэҕэ хомуур үлэтэ этэҥҥэ түмүктэнэн эрэр

Саха сиригэр 2019 сыл хомуур үлэтин түмүгүнэн 479,4 тыһыынча туонна от, 24,3 тыһыынча туонна сиилэс уонна 14,2 тыһыынча туонна сенаж бэлэмнэннэ. Бу көрдөрүү быйылгы дьыл уопсай былаанын 93%-гар тэҥнэһэр. Бу туһунан СӨ Ил Дарханын уонна бырабыыталыстыбатын пресс-сулууспата иһитиннэрдэ. Айсен Николаев быйылгы 2019 сыл хомуур үлэтин кэмигэр күн-дьыл үчүгэйдик туран биэрдэ диир. Ол да буоллар хомуур үлэтэ бүтүөр диэри ыһыктан кэбиспэккэ, үлэни былаан быһыытынан сөпкө түмүктүөххэ наада диэн ыҥырар. Ил Дархан бэлиэтииринэн Дьааҥы, Мэҥэ-Хаҥалас, Уус Алдан, Нам улуустарыгар уонна Дьокуускай куоракка кэккэ ыарахаттар бааллар. «Баар кыһалҕалар бары этэҥҥэ быһаарыллыахтара диэн эрэнэбин. Сорох улуустарга, холобур, Бүлүү бөлөх улуустарыгар, тоҕоостоох усулуобуйалар бэлиэтэнэллэр. Манна саппаас от бэлэмнииллэр. Онон быйылгы дьылга кыстык оту бэлэмнээһиҥҥэ улахан кыһалҕаны көрбөппүн», – диэтэ Айсен Николаев. Атырдьах ый бүтэһик көрдөрүүтүнэн өрөспүүбүлүкэҕэ уопсайа 441 тыһыынча га ходуһа охсулунна. От үлэтин хомууругар уопсайа 17 тахса тыһыынча киһи, 6 тыһыынчаттан тахса тиэхиньикэ кыттынна.