Халаан кэмигэр өрөспүүбүлүкэ үрдүнэн 92 төбө сүөһү, 151 төбө сылгы, 11 төбө дьиэ көтөрө ууга былдьанна

Саха сиригэр халаан кэмигэр сүөһүнү-сылгыны үрдүк сиргэ үүрэр үлэ ыытыллыбытын үрдүнэн, сүөһү-сылгы ууга былдьаммыт түбэлтэрэ таҕыстылар. Бэс ыйын 5 күнүнээҕи туругунан, өрөспүүбүлүкэ үрдүнэн 92 төбө хороҕор муостаах, 151 төбө сыспай сиэллээх, 11 төбө дьиэ көтөрө ууга былдьанна. Ааҕар үлэ билигин да ыытыллар, онон ахсаан өссө эбиллиэн сөп. Бу туһунан СӨ ветеринарияҕа департаменын пресс-сулууспата иһитиннэрэр. Биэдэмистибэ төһө дьиэ сүөһүтэ ууга былдьаммытын ааҕар уонна хонтуруоллуур, хас биирдии дьиэ сүөһүтүн өлүгэр аахта толорор. Салгыы ветеринарнай сулууспа бу өлүгү харайарга, оройуон, нэһилиэк дьаһалтатын кытта ыкса үлэлэһэр уонна хонтуруоллуур. “Өлүгү тиэйэн илдьибит тырааныспары, умаппыт сирдэрин барытын дезинфекциялыыллар”, – диэн иһитиннэриигэ чопчуланар. Пресс-сулууспаҕа бэлиэтээбиттэринэн, тыа хаһаайыстыбатынан дьарыгырар оройуоннарга муниципальнай тэриллии баһылыктара өлүгү харайар үлэни ыытарга, тиэйэр тырааныспары, уматыгы уонна туһааннаах дьону булуохтаахтар. Маны таһынан халаан уута түспүтүн кэннэ, ветеринария үлэһиттэрэ дьиэ сүөһүтүн эмтиир үлэни ыыталлар.-яв//фа