Саха сиригэр бородуукта сыаната 2017 сылга төһө хамсаабытый?

NVK-ONLINE.RU – Бүтэһик сылларга экономика уустук туруга, хас биирдии киһи харчытын, ороскуотун суоттанарга күһэйэр. Саҥа сыл үүннэҕинэ, туох бары эйгэҕэ үбү кытта ситимнээх уларыйыылар учуоттаналлар, ол онно олоҕуран сыл сабаҕалааһын хартыыната ойууланар. Үүммүт сыл күнэ дьыла саҥа ааҕыллан, дьон биир үксүн аска сыана хамсаабытын билэ илик эбит. Киһи маҕаһыыҥҥа чопчу атыылаһар бородууктатын түмүк сыанатын төлүүр, онон киилэнэн суокка төлөбүр уларыйбыта биллибэккэ хаалар. Онтон килиэп курдук сүрүн социальнай суолталаах бородуукталарга хамсааһын тахсыыта, тута хаһыакка, телевидениеҕэ кэпсэнэр. Билигин бородуукта сыанатын ырытар чопчу матырыйааллар тахса иликтэр. Сыл устата маҕаһыыныттан, ырыынагар диэри бородууктаҕа уларыйыыны кэтиир кэмитиэт кыра уларыйыылар тахсыбыттарын сырдатар. Вера Мякишева бүгүн кэлэн эт сыаната киилэтигэр 20 солкуобайынан ыараабытыттан соһуйар. Дойду үрдүнэн орто хамнас кээмэйэ 5 сыл анараа өттүгэр көрдөрүүтүгэр тиийэ түспүт. Ол аата хамнас, пиэнсийэ индексацията кыра, кэм уларыйыытыттан бытааннык хамсыыр. Биир сиргэ турар диэтэхпитинэ, сыыспаппыт. Саха сирэ территорията улаханыттан бородуукта сыаната лаппа араастаһар. Холобура, кыһынын оҕуруот аһын сыаната үрдүүр. Дьокуускайга саамай чэпчэки сыаналаах Кытайтан кэлбит помидор 180-190 буоллаҕына, хоту сиргэ сыаната көмүскэ тэҥнээх – 400 солкуобайга тиийиэн сөп. Дойдуга ханнык да балаһыанньа тирээтэҕинэ, социальнай суолталаах бородуукталарга сыана тутуллара ирдэнэр. Холобура бары улуустарга бу испииһэккэ олохтоох дьаһалта суол ороскуотун учуоттаан сыана олохтуур. Ол онтон урбаанньыт сыаната улаханнык араастаһыа суохтаах. Хоту бары өттүттэн төһө даҕаны өйөбүл баар буоллар, сыананы чэпчэкитик тутар уустук. Кризис кэмэ дьону харчыны суоттанарга үөрэтэр. Бу маны маҕаһыын үлэһиттэрэ кытта бэлиэтииллэр, Дьокуускай маҕаһыыннарыгар атыылаһааччы ахсаана уонна күҥҥэ барыыр харчыта аҕыйаабыт. Билигин куоракка сымыыт ортотунан 95 солкуобай, үүт 65-75 диэри, чэпчэки мас арыыта 86 солкуобай, рис 53, саахар киилэтэ 78, үрүҥ килиэп 44-45, бурдук киилэтэ 45 солкуобайтан саҕаланар. Сорох маҕаһыыннар чугастыы биирдэ лааппы суох буоллаҕына, ытырыык сыаналары уруһуйдууллар. Онно ким даҕаны бопсор, ирдэбил туруорар бырааба суох. Онон хас биирдии киһи үбүн-харчытын суоттана сылдьара ордук.