Саха сиригэр халаан кэнниттэн чөлүгэр түһэрэр үлэҕэ кыттыһыан баҕалаах дьон ахсаана элбиэ

Саха сиригэр халаан кэнниттэн чөлүгэр түһэрэр үлэҕэ кыттыһыан баҕалаах дьон ахсаана элбиэ. Бу туһунан халаантан эмсэҕэлээбит оройуоннарга чөлүгэр түһэрии боппуруостарын ырытыһар мунньахха СӨ бырабыыталыстыбатын бэрэссэдээтэлин маҥнайгы солбуйааччы Алексей Колодезников иһитиннэрдэ. “Көмөлөһүөн баҕалаах дьону кытта үлэ мөлтөхтүк ыытыллар. Волонтердары уонна тутуу этэрээттэрин хомуйуу боппуруоһа быһаарыллыбатах. Баҕалаах дьон ахсаанын элбэтиэххэ наада”, -диэн эттэ. Чөлүгэр түһэрии үлэтигэр тутуу этэрээтин 366 байыаһа үлэлиэ диэн буолбута. Ол эрэн өрөспүүбүлүкэҕэ федеральнай таһымнаах ыксаллаах быһыы-майгы балаһыанньата биллэриллэн, 22 муниципальнай тэриллии сайаапка түһэрэн, эбии 285 киһи наада буолара биллибитэ. Бу туһунан СӨ ыччат уонна дьиэ кэргэн бэлиитикэтин миниистирэ Иван Луцкан иһитиннэрдэ. “Биһиги хас биирдии муниципальнай тэриллиини кытта хас киһи наада буоларын үлэһэн олоробут. Үлэ бары нэһилиэнньэлээх пууннарга араастаһар, ханна эрэ күрүө оҥоһуута, ханна эрэ бөҕү-сыыһы хомуйуу уо.д.а. Устудьуон этэрээттэрэ муниципальнай тэриллиилэргэ 30 күн үлэлиэхтэрэ, үлэ кэмин хас биирдии нэһилиэги кытта туспа кэпсэтиэхтэрэ. Бэс ыйын 12 күнүттэн халаан содулун туоратарга тутуу этэрээттэрин байыастарын баһыйар өттө үлэни саҕалаыахтара. Маны таһынан сессияларын эрдэ саппыт байыастар, түргэнник туһааннаах сиргэ барарга бэлэмнэр”, – диэн эттэ. Луцкан эппитинэн, волонтердары кытта үлэлиир киин ыам ыйын 14 күнүттэн Дьокуускайтан көмөҕө барыан баҕалаах дьону хомуйан саҕалаабыта, маны сэргэ миэстэтигэр эмиэ баҕалаах дьону хомуйбуттара: Аммаҕа – 1000 киһини, Хаҥаласка – 250 киһини, Чурапчыга – 200 киһини уонна Уус Маайаҕа – 70 киһини. -яв//кс