АРШIЫЙАРИ АГВЫРГЪЬАРИ РЫТШГIВА

Къарча-Черкес Республика а-Хъада ТЕМРЕЗОВ Рашид Зеленчук район даъан. ЗымгIва йрапхъата Темрезов Рашид КЧР АуагIа Айззара (а-Парламент) а-Председатель ИВАНОВ Александр, Зеленчук район администрация ахъада НАУМЕНКО Алексей Исправна станица йтагылу Абашта айсра Ду йалаз рчвахъабага ащапIы ахIврапшдзаква щтIарцIатI. Асасчва ари астаница акультура Тдзы агIахътIра йазынархаз айззара йалан. – Асквш 2011 агIан араъа хIаъан, рчIаджьра ду зтахъыз атдзы гIахIыршIыцхуаши датша хIуыхвуши щаквхIыргылуан, – йхIватI Темрезов Рашид. – Турых магIны зму акультура уыхвара гIащаквыгIжьырныс хIангIалтI йгьи хIгьымгIващатI. Абар уахьчIва ауыжвгIанчIви тахъыраква йрыквыргIапсу аршIыйари агвыргъьари рытшгIва абзазагIвчва швыхъазла йгIахъхIтIытI. Ари агIаншара сквшщарда цIуата йазпшуаз ашвахIвагIвчви агIахIвыгIвчви концерт джьащахъва гIадырбатI. Те м р е з о в Р а ш и д сквшщарда акультури азъазари ртшауацIыхра йазынхауа Исправна кыт акультура Тдзы аунашвачпагIв Быковская Светлана игьи абиблиотека нхара аветеран Хижняк Мария аразыра сальамшвъаква риттI. Астаница абзазагIвчва рыхьызла Левченко Антонина ауагIахъа ркультура цIасква рхчара йазынхауа ртыдзталхьа лшарата йызчпаз Темрезов Рашид аразыра ажваквала тшизыналырхатI. Исправна кыт акультура Тдзы арчIаджьра асквш 2017 июнь агIан йджвыквырцIатI. «Развитие культуры и туризма» къральыгIва программа апкъ йтата анхараква рыхъазла ахча афедеральна йгьи ареспублика бюджетква йгIауырщттI. ЙгIадыршIыцхыз ауыхвара 340-гIв зыгIвнашвуш зал амапI, агIахIвыгIвчва тшъарбжьуш, акружокква ъагIвнанхуш йгьи унагIвара йалалуа ашвъа йъанырцIуш апещква алачпапI. ХIызту асквш ауацIа акытква рпны йаныргIалу культура тдзыта жвба гIадыршIыцхуаштI, Счастлива, Каменномост, АлбыргIан, Къвайдан, Сторожевая, Адильхалкъ, Бесленей кытква рпны акультура тыдз шIыцква руыхвуштI, Курджиново йгьи Учкекен рпны йтагылу акультура нхартаква дырчIаджьуаштI.