Чун савăнать, чĕре сикет, Татах та хастар пулас килет

Юхмапа Пăла тăрăхĕнче пурăнакан тĕрлĕ наци çынни ĕçпе канăва яланах пĕрле çыхăнтарма хăнăхнă. Вăл вара ĕç тухăçлăхне ỹстерме, пĕр-пĕрин хушшинчи çыхăнăва, туслăха çирĕплетме пулăшать. Хальхи вăхăтра районти уй-хирти анасем пушанса пĕтрĕç. Хĕрỹ вырма ĕçĕсем хыçа юлчĕç темелле. Тыр-пул пуçтарса кĕртнĕ тапхăрта çĕр ĕçченĕсем çеç мар, культура работникĕсем те канлĕхе çухатаççĕ. Уй-хир ĕçченĕсене, выльăх-чĕрлĕх пăхакансене ĕçлеме хавхалантарас, вăй-хăват хушас, савăк кăмăл парнелес тĕллевпе Пикшик ял тăрăхĕ çумĕнчи агитбригада ушкăнĕ те Л. Кольцова ертсе пынипе сахал мар концерт программипе тухса çỹрерĕ. Пирĕн ял тăрăхĕнче тĕрлĕ наци çынни пурăнать: чăваш, тутар, вырăс. Çавăнпа та хамăрăн программăна хатĕрленĕ чухне çакна та шута илетпĕр. Коллективсенче ытларах халăх юррисене хапăл туса кĕтсе илеççĕ. Çамрăкрах ăрурисемшĕн эстрада юррисем çывăхрах. Унчченсенче районти ялсенче агитбригада ушкăнĕсем йышлăччĕ. Вĕсем йĕтем çинче те, хирте те, фермăсенче те пулатчĕç. Ырă ĕçе малалла тăсса, эпир те хамăрăн ушкăнпа çулсеренех мухтавлă çĕр ĕçченне юрă-кĕвĕпе савăнтарасшăн. Н. ВАХИТОВ, Хирти Пикшикри культура çурчĕн директорĕ